John 13

Pasova murimurita aririna.

Mt. 26.7-30; Mk. 14.17-26; Lk. 22.14-39

1Pasova mataasina sora, Iesu i nuatuiyao ena huia i lagemao, tanoubu abo i laugabaei i lau Tamana arinai, enanayao mamohoi tanoubu eai se mia i gadosisiedi, abo i gadosisiedi i lau e, anasiga eai. 2Isi se aieaugogo lautom, diabolo Iuda Isakariota, Simona natuna, nuana eai moru ie tore. 3Iesu i nuatuiyao Tamana ginauri gamagaridi i toredi ia nimana eai, eo i nuatuiyao Eaubada arinai i laoma, eo i uiouio hinage Eaubada arinai. 4I aiai nonoha abo i toro, ana lulu i torehesuaradi; tawela ie abi, abo ie lio. 5Goila gaeba eai abo i hegoiauri, heaheata aedi i deuridi, tawela ie lio wa arinai i saudi. 6Abo i laoma Simona Petero arinai: Petero i ribalau ia arinai i ene, “Guiau e, aegu abo u deuri wa?” 7Iesu i heuio ia arinai i ene, “Laulau ta ea laulauei abo ina ta nige u nuatulobai: sora maraitom asubena abo u ita.” 8Petero ia i heriba i ene, “Aegu taba nige u deuridi.” Iesu ia i heuio i ene, “Ena nige ea deurim oa taba nige tupona u abi arigu eai.” 9Simona Petero ia i heriba i ene, “Guiau e, aegu mo nige’e nimagu eo urugu hinage.” 10Iesu ia i heriba i ene, “Ia se deuriyao aena mo abo se deuri, na tauna maudoina i aa’o: hinage omi au aa’o, gamagarimiu mo nige’e.” 11Paana i nuanuatui eai abo ia i morui: arinai i ene, “Omi gamagarimiu nige au aa.”

12Ia aedi i deuri nonohaidi, ana lulu i abidi, eo i bawabigabigauio, abo i heribadi i ene, “Wau egu abiabi wa au nuatui? 13Omi au awatanuagaegu eo au awaguiauegu: hinage au riba mamohoi; eau ede. 14Eau ina emi Guiau, eo Tanuagamiu aemiu ea deuridi ta; omi hinage aemiu au haideuri abo i lolo. 15Iilagu ea heitamiuo, omi bena au laulauei doha egu abiabimiu wa. 16Mamohoi, mamohoi, ea heribamiu ta, Tauheaheari ana tanuaga nige i saepoi; ia se hetamari, tauhetamarina hinage nige i saepoi. 17Ena wau riba wa au nuatuidi, au abidi hinage abo au nualolo. 18Egu riba wa omi gamagarimiu nige ami riba: isi ea hineridio wa ea nuatuidi: taiede, bena uriuri tabuna se hemamohoiei, si ene, ‘Esau maegu falawa ai ai esega, ia aegedurina eai i utuigu.’ 19Ea heribanonohaimiu ta, e ie tubu, abo au nuatui iaede eau. 20Mamohoi, mamohoi, ea heribamiu ta, ia esa ea lauhetamaridi i oiyamidi i oiyamigu hinage; ia i oiyamigu tauhetamariguma hinage i oiyami.”

Iesu ena moru i riba nonohai.

Mt. 26.20-25; Mk. 14.17-21; Lk. 22.21-22

21Iesu nei riba ne ie ribanonohai, earuana abo i nuadubu, i ribamasaraha, i ene, “Mamohoi, mamohoi, ea heribamiu ta, ami sagu esau abo i moruigu.” 22Ena heaheatayao abo se haimatainoino, nuadi se ponopono, se heunaboisaha, si ene, eai ie ribaei. 23Iesu nuapouna eai heaheata esau i otabigabiga, Iesu ia i gadosisiei wa. 24Arinai Simona Petero i nimaoini, doha i ene, “U oimuri eai i ribaei wa?” 25Ia wa Iesu nuapouna eai i otabigabiga i heriba i ene, “Guiau e, eai wa?” 26Iesu i heiuo i ene, “Taba aiai begana ea hedatudobei, esau arinai abo ea mosei, iaede.” Aiai begana i hedatudobei, abo i mosei Iuda Isakariota arinai, Simona natuna. 27Wau aiai wa ie abi abotai Satani nuana eai ie lu. Iesu abo i heriba i ene, “Em nuatu saha, u abi heuheulai.” 28Nige tau esau hatahata eai ina riba ta aniona i nuatulobai. 29Headi edi nuatu si ene, paana Iuda moni tobona tauabina Iesu ia i heriba, i ene, “Ada mataasi aiaina u lau u uneunema;” e gogogesagesa tataodi ginauri headi i mosei isi aridi eai. 30Ia aiai begana wa ie abi, abo i lulage murimuri eai: i maionao.

31I lulage murimuri eai, Iesu abo i ene, “Abo ina Tau Natuna se hedebasaei, Eaubada ia arinai hinage se hedebasaei. 32Taba ia arinai abo Eaubada se hedebasaei, Eaubada ia hinage abo i hedebasaeuioi, eo ia i hedebasaei ma esega. 33Merumeru e, egu huia arimiu eai begana mo ie ota. Sora abo au eooigu: doha lahinae Iudea tataodi ea heribadi wa, ea ’ne, ‘Egu aba lau, taba nige au laoma arinai;’ hinage ea heribamiu ta. 34Laugagaeo harihariuna ea leawa. Esau esau au haigadosisiuioimiu; doha eau ea gadosisiemiu, omi hinage au haigadosisiuioimiu. 35Taba omi au haigadosisiuioimiu, arinai tatao gamagaridi abo se ita, si ene, omi egu heaheatayao eai aue lau.”

Iesu Petero ena uhara i riba nonohai.

Mt. 26.33-35; Mk. 14.29-31; Lk. 22.33, 34

36Simona Petero ia i heriba i ene, “Guiau e, haedi u lau?” Iesu ia i heriba i ene, “Egu aba lau wau ta taba nige u hemuriwataigu: taiede abotai abo u hemuriwataigu.” 37Petero ia i heriba, i ene, “Guiau e, ie saha wau ta nige ea hemuriwataim? Oa debam eai, egu mauri abo ea torehebiga.” 38Iesu ia i heuio i ene, “Eau debagu eai, em mauri abo u torehebiga wa? Mamohoi, mamohoi, ea heribam ta, kamkam sora nige ie dou, oa ma haiona abo u uhara bagunaigu.”